HomeTermineBioMediaKontakt

Gstanzl zur Lage der Nation II

 

Ja Medaillen in Sotchi

kemma von unsere Langläufer nicht mehr erwarten.

Unser bestes Pferd im Stall, d’Angela Merkel,

konn verletzungsbedingt nicht starten.

 

Wenn Politiker koan Bock auf Arbeit ham,

dann gehngans zur Bundesbahn,

weil då kemma mehra zam,

de z‘ faul zum arbeitn san!

 

Leit der Bundesbahn-Profalla,

des is ein Knaller, total ballaballa,

der kommt nie in die Walhalla,

sondern höchstns in de Narrhalla!

 

Wenn wer an Doktortitel bei de Tschechn kaaft,

dabei sei Unschuld beteuert,

und ois Dr. Scheuer rumlaaft,

sågt ma: Der Mann is bescheuert!

 

In da CSU sågns: Wer betrügt, der fliegt!

Des is no koane 8 Tåg her.

Eigentlich muass hoaßn: Wer betrügt

werd CSU-Generalsekretär.

Gstanzl zur Au in der Hallertau

Die Anfangsgstanzl von unserem Auftritt beim Dellnhauser Volksmusikfest.

Mir sågn grüaß Gott es Leitl alle,

in der herrlich geschmückten Hopfenlandhalle.

Ja sågts, wo samma då heit glandt,

beim Volksmusikfest im Hopfenland.

Wo si ‘s ganze Jåhr nix rüaht,

a jeder Weg nach Hirnkirchen führt,

wo oa Halle nebn da andern steht,

aber a Realschui, des håms net!

 

Vom Burgamoasta Karl Ecker is zum hörn,

der konn oiwei no a Pfarrer wern.

Weil zum heiraten, werd’s langsam z‘ spät,

und in‘ Bundestag wui er jetz doch net.

Da sparsamste is er weit und breit,

baut a Halle her, für 800 Leit,

aber bloß 400 Stühle kaaft er gråd,

drum sitzn 400 von euch auf Leihstühle vom vielgeliebten Nandlstådt.

 

Gstanzl zur Lage der Nation

 

Beim Thema Windkraft draaht si da Seehofer

wia a Windraadl im Wind,

und an Wind macht er aa no soiber,

oamoi vorn und oamoi hint.

 

Seit der Verwandtschafts-Affaire,

då woaß i ganz gwiß,

warum de CSU scho oiwei

für ein Betreuungsgeld gwesn is.

 

Ja der Dobrindt is a scheena Mo,

von de Füaß bis zum Hois,

aber na kimmt hoit da Kopf

und der versaut wieder ois‘.

 

Boid draam i von de Ochsn,

boid draam i von de Küah,

boid draam i von da Ilse Aigner,

wås gscheits draam i nia!

 

Wenn da Umweltminister Altmaier amoi stirbt,

håm de Sargträger a Problem.

Für sechse is er z‘ kurz

und viere könnan net dahebn.

 

Der Mensch fliagt im Weltraum rum

und entdeckt sogår des Gottesteilchen von dem Higgs,

aber dass de Bayern amoi anders wähln daatn,

dafür erfindn ‘s nix.

 

Wenns schneibt, na schneibts weiß,

wenns  gfriert, gibts a Eis,

werst oid, verlierst d‘ Håår,

wenns aus is, is‘ går!

WordPress Cookie Plugin von Real Cookie Banner