AUS’M BIERMOOS

Well-Brüder: „Kreuzzug“

 

In Bayern is da Teifi los, es herrscht große Not,

unser christliche Partei werd von da AfD bedroht.

Doch unser Markus Söder, nana, då feiht si nix:

Der macht jetz einen Kreuzzug, in der Hand das Kruzifix!

 

In jedem Amt in Bayern hängt ab sofort ein Kreuz,

dazua der Bibelspruch: Hopfen und Moiz, Gott erhoits!

Mit Schweinsbråtn und mit Leberkaas, Enzian und Bier,

marschieren de Glaubenskrieger, und singan: ‘mir san mir‘!

 

Da Söder führt das Bayernland in den heiligen Krieg,

de Wähler von da AfD marschieren fleißig mit.

Ausstaffiert mit Lederhosn und mit Lodnjackn,

und manches Kreuz, wo mittrågn werd, des håt an kloana Hakn!

 

Bayern is jetz wieder Gottesstaat, es herrscht der Wahre Glaubn,

a jeder BMW kriagt a Kreuz auf d‘ Kühlerhaubn.

Aus de Kreisverkehre machas wieder Kreuzungen zu Hauf‘,

in de Autowaschanlagen drehns Weihwasserschleusn auf.

 

Hinter schweren Schneekanonen steht die Gebirgsschützenhisbollah,

und da Markus Söder werd zum Frankenayathollah.

Wer net dabei is, sågt er, muaß runter in de Hoi‘,

dann machans, moant er, bei da Wahl ‘s Kreuz an da rechtn Stoi!

 

Da Opposition in Bayern, gehts endgültig an‘ Krågn,

de Rotn und de Greana müaßn Dornenkronen trågn.

An Seehofer und de Aigner konn da Söder går net riacha.

De lasst er oamoi in da Woch‘ vor eahm zu Kreuze kriacha!

 

In da Zeitung bloß no Kreuzworträtsel, am Oktoberfest in Minka,

då muaß ma jetz statt ‘life is life‘ Halleluja singa.

Im Himmi drobn, da Herrgott denkt si: San de Bayern blöd!

In jedm Amt håms a Kruzifix, aber a gscheits Internet håms net.

Wenn da Jesus nåch drei Tåg net auferstanden waar, des konnst ma glaam,

dann daat er sågn: Kreuzkruzefix! Und sich im Gråb umdraahn!

 

Tags: ,